【Emily】人均每日冲廁用水91公升 八成海水

【明報專訊】水務署早前話正研究調整水費，新民黨議員容海恩關注，署方會根據咩準則決定水費調整幅度，以及每年食水同冲廁水嘅用量等。根據水務署資料，2022/23年度每日人均冲廁用水量91.4公升，當中近八成係海水，比例同過往相若。水務署就話，海水供應網絡已覆蓋全港約85%人口，目標係提高用海水及循環再用水嘅冲廁比例至九成以上。

水務署又話，2022/23年度每日人均住宅食水耗量係141.7公升，較2018/19年度嘅134.1公升增加約5%；2023年香港食水總用量為10.68億立方米，當中東江水同本地水源嘅供應量分別佔77%及23%。成本方面，2022/23年度東江水成本為每立方米11.1元，較2018/19年增加4.7%；本地水源成本同期增加約4.1%。

水署：水費成本回收率跌穿80%

市民最關注係會唔會加水費，容海恩噚日喺立法會提書面質詢，問水務署會根據咩準則決定水費調幅，署方回覆，政府嘅水費政策採取「用者自付」及「收回服務成本」原則，水務經營帳目自1998/99年度起錄得虧損，最新成本回收率跌穿80%水平，檢討水費時會考慮政策原則、市民負擔能力等因素。