【Emily】文錦渡電動旅巴投運 免費搭至7．24

【明報專訊】發展新能源車係大勢所趨，有本港電動車公司就同內地公司合作設計製造電動旅遊巴，仲喺噚日首航，將會跨境來回上水同文錦渡口岸。跨境巴士營運商話，為咗慶祝七一回歸紀念日，由今日起至7月24日會畀人免費搭電動巴，預計超過8800人次受惠。

香港國際能源電動車集團聯同安徽安凱汽車製造商設計同製造嘅「安凱A9」，係一部49座位純電動旅遊巴。引入「安凱A9」嘅營運商中國華通話，每部電動旅遊巴可以慳到約七成燃料費，計劃未來兩年全線換做電動巴。

中國華通噚日宣布，「安凱A9」免費乘車月期間，每日喺上水同文錦渡口岸各有3班車開出，免費乘車證會喺兩邊站嘅售票處，以派籌形式喺開車前一個鐘開始派發。

香港國際能源電動車集團話，未來仲會引入65座位電動巴士，去滿足本港對營運屋邨巴士等需求，亦會陸續引入包括中巴、小巴、雙層巴士等電動車款。