【Emily】陳學鋒嫌戙喺中環海濱篤眼篤鼻 要求改位 通風樓起喺地底？ 運輸局：唔實際

【明報專訊】政府打算喺中環海濱活動空間興建約13米高嘅港鐵通風樓，預計下年開始動工，為期7年。現時海濱會搞演唱會同活動，民建聯立法會議員陳學鋒就認為，中環海濱有獨特優勢，例如睇到維港美景，質疑通風樓係咪要「篤眼篤鼻咁樣，成支戙咗喺個海濱長廊」，問相關部門有無考慮過將通風樓「瞓低佢」，甚至「擺喺地底」。運輸及物流局副局長廖振新就回應話，「通風樓顧名思義就係要通風」，目的係要接駁地底隧道去地面通風，如果可以喺地底通風，就唔使提出起通風樓，認為呢項建議唔太實際。

經民聯立法會議員陸瀚民噚日喺立法會口頭質詢，擔心通風樓會影響中環海濱活動空間舉辦盛事，幾個發言嘅議員都提出相近關注。

甯漢豪話仍夠地方搞活動

發展局長甯漢豪就話，港鐵要喺地底下面起「機場鐵路調頭隧道延展段」，起約500米長嘅隧道，畀東涌線同機場快線列車喺香港站東面後方轉換路軌和掉頭，咁就可以增加列車班次，因應通風同消防需要，地面必須有通風樓暨緊急通道大樓接駁隧道。甯漢豪話海濱空間有3.7公頃，而將來嘅通風樓只佔1200平方米，仍夠地方搞演唱會及活動。廖振新亦補充，佢亦都明白議員嘅意見，希望港鐵再諗辦法，將工程影響減到最低。