【Emily】婆婆話「終於唔使轉車」 林世雄感動

【明報專訊】京港臥鋪列車上周六晚開通，運輸及物流局長林世雄同唔少傳媒都有搭首班車上京，大班人成晚流流長，最啱傾心事，林局長就相約記者喺車廂夜話。局長話，好記得當年有份策劃高鐵，負責菜園村收地，高鐵喺立法會申請撥款時引起唔少風波，唔少人批評高鐵係「大白象」、反對「一地兩檢」，但𠵱家唔少市民讚高鐵方便，令佢感觸良多。

林世雄話，今次卧鋪列車開通除咗圓咗佢當年策劃高鐵其中一個心願，最感觸係見到有傳媒喺車票開賣時訪問到一個婆婆話由香港到石家莊終於唔使轉車，婆婆表情期待已久，令佢好感動。

卧鋪列車「夕發朝至」，乘客朝早到達目的地，有記者問林世雄會推介啲咩北京同香港早餐畀乘客，局長就話次次去北京都留喺酒店食，佢都要請教當地人；至於香港早餐佢就推介奶茶、菠蘿油同蛋撻，又講笑話如果大家唔知去邊度食可以聯絡佢，局長可以親自介紹。

運物局亦上載短片記錄局長坐車嘅一日，見到局長深夜返到車廂牀位，翻吓旅遊雜誌後瞓覺，然後噚日朝5點半起身，換上運動裝，喺車上搵位做早操，話日日運動身體好，然後先開展北京忙碌嘅工作。