【Emily】故宮館法國服飾展 莫文蔚三語導賞 近400件首訪亞洲 最老逾250年

【明報專訊】香港故宮文化博物館今個月底將推出全新特別展覽「法國百年時尚——巴黎裝飾藝術博物館服飾與珠寶珍藏，1770-1910年」，展出近400件18世紀末至20世紀初嘅法國服裝、珠寶配飾。今次展覽邀請咗時尚風格百變嘅歌手演員莫文蔚（圖）錄製「星」音導賞，帶領觀眾了解法國時尚百年嚟嘅演變，同埋服飾對身體形態嘅塑造，仲會分享佢最喜愛嘅珍品，為大家娓娓道來法國時尚歷史故事。

展覽合辦方之一嘅巴黎裝飾藝術博物館擁有法國最重要嘅時裝收藏，今次展覽幾乎所有展品都係首次喺亞洲展出，部分甚至從未喺巴黎或法國以外展出，展覽結束後會送返法國。率先亮相嘅重點展品包括一件18世紀法國女性貴族宮廷禮服，由外袍、長裙、三角胸衣組成，附以金絲、銀線及蕾絲點綴，係今次展覽其中一件歷史最悠久嘅展品。

至於由莫文蔚錄製嘅語音導賞設廣東話、英語及普通話共3種語言，觀眾可透過館內語音導賞設備或自備智能手機現場收聽，亦可以去博物館網站重溫。展覽由今個月26日至10月14日開放，特別展覽成人門票票價150元，適用於小童等嘅特惠門票就75元，另設特別套票。