【Emily】葉劉去幼園畢業禮 頒獎畀「劉俊謙」

【明報專訊】近期最紅男影星之一必數「信一」劉俊謙，新民黨主席葉劉淑儀噚日出席「聖公會幼稚園71周年畢業典禮」時，就遇到「劉俊謙」，葉太讚佢非常帥氣，仲頒獎畀佢——其實係同男星同名同姓嘅畢業生。聖公會幼稚園自1945年創立，最初嘅名字係「聖保羅學校附屬幼稚園」，葉太提到，第一屆特區政府首席法官李國能都係該校第一屆畢業生。

葉太仲遇見唔少老朋友，包括觀禮嘅前同事、前經濟發展及勞工局長葉澍堃，負責介紹葉太出場嘅正係葉澍堃嘅孫女。葉太大讚佢朗讀「香港特別行政區行政會議非官守議員召集人，大紫荊勳賢、GBS，JP」時非常淡定，非常難得。

今屆有百多名畢業同學，葉太話當中唔少都上台表演，分別以廣東話、普通話、英語獻唱及致辭，仲話諗唔到小小年紀嘅同學仔兩文三語已非常流暢，而且無論係負責致送紀念品或上台領獎嘅小朋友，都乖巧伶俐、彬彬有禮。葉太又話，黨友容海恩嘅大女昌蔚係獲獎學生之一，話昌蔚上台即主動同佢打招呼並鞠躬致謝。