【Emily】中總立會「打卡」 梁君彥叫停

【明報專訊】中華總商會噚日組團到立法會參觀，其間發生小插曲，部分人到會議廳公眾席影相留念，正在主持會議嘅立法會主席梁君彥見狀提醒：「請公眾席嘅人士唔好影相，好嗎？請你坐低。」眾人之後聽從勸告，無再影相。

中華總商會會長蔡冠深噚日率團到立法會，先後到前廳、會議廳等地方參觀。佢哋到會議廳公眾席時，部分人一齊合照，亦有人舉起手機自拍，代表商界（二）嘅建制派「班長」廖長江亦在場。由於當時正舉行立法會大會，梁君彥見狀打斷議員發言，要求佢哋坐低同埋唔好喺公眾席影相。

根據立法會《行政指令》，公眾人士喺會議室或公眾席不得拍攝或錄影會議過程、應該就座、並遵守立法會人員為維持秩序發出嘅指示，違者最高可被罰款2000元及監禁3個月。