【Emily】小紅書有呻未享福利「後悔拿香港身分」 孫玉菡：為福利來港 唔係優才正確心態

【明報專訊】勞福局長孫玉菡噚日喺facebook發帖，話最近留意到內地社交媒體有帖文聲稱經「優秀人才入境計劃」來港之後，無法喺香港享有各項福利。孫強調優才計劃係為咗吸引頂尖同高技術專才來港定居，深信有意來港嘅優才係着眼於香港發展機遇同優勢，如果有人來港係為咗享受福利，就唔係正確嘅心態，亦有違計劃原意，最終唔會成功融入香港呢個大家庭。

近期有內地網民喺「小紅書」分享話有優才計劃來港嘅朋友，來港一個月後就已經大呻「後悔拿香港身分了」，發現好多福利都無法即時享受。

孫玉菡話深信有意來港嘅優才係着眼於香港發展機遇同優勢，為自己謀求更大發展之餘，亦為香港經濟作出貢獻價值。佢亦相信到港嘅人才唔會考慮係咪可以享有香港福利，而係着眼於盡快創業或搵工，以符合續簽要求。

孫玉菡又話，優才計劃由去年1月至上月底已接獲近10萬宗申請，同期約有1.8萬人獲批來港，廣受各地人才歡迎。佢透露，截至上月底，各項人才入境計劃共收到超過30萬宗申請，近19萬宗獲准，超過12萬名人才已經來港。