【Emily】政府宣傳吸全球人才 馬貝利拍片打頭陣 讚港機遇處處

【明報專訊】政府噚日推出新一輯電視宣傳短片邀請全球人才落戶香港，邀請咗9個世界各地唔同專業同背景嘅人才分享落戶香港嘅原因，打頭陣嘅係早前經「高才通」來港嘅NBA及CBA名宿馬貝利（Stephon Marbury）。佢喺短片形容香港係融會多元文化嘅城市，無語言障礙，到處都係新機遇，仲有各式美食，自己學識嘅第一個廣東話詞彙就係「好味」。

人才辦Instagram噚日分享短片，馬貝利仲留言大讚香港。人才辦話，宣傳短片展現咗香港活力同璀璨嘅城市面貌，將會分階段播出，介紹香港享有簡單稅制、頂尖教育同醫療服務等，同埋作為國際金融中心以至大灣區中心城市及亞洲國際都會嘅獨有實力、優勢同發展機遇，展示香港作為國際人才樞紐同國家人才門戶嘅雙重角色。