【Emily】端午維港夜空睇龍舟

【明報專訊】旅發局今個月將舉辦五大活動，其中於下周一端午節（10日）當日夜晚8點，旅發局會喺灣仔海濱對出海面，舉辦以龍舟節慶為主題嘅無人機表演，到時會以1000架無人機拼出可愛卡通糉、龍舟競渡、飛龍在天等節慶畫面圖案。

下周六晚第二場海上煙火

而於下周六（15日）香港國際龍舟邀請賽舉行當晚8點鐘，喺灣仔海濱對出海面會舉辦第二場海上煙火表演，全長約10分鐘，其間會展示「HK」字樣及開心笑面圖案，當晚7點半及7點45分會先發放數秒嘅迷你煙火，預示表演位置同「炒熱現場氣氛」。香港國際龍舟邀請賽會喺尖東海濱舉行，旅發局話由於九龍沿岸距離較遠，未能清晰觀賞煙火表演，如果想睇埋煙火就要過對面海喇。

旅發局話，兩場表演嘅最佳觀賞位置分別係灣仔「水上運動及康樂主題區」同「HarbourChill海濱休閒站」。

灣仔碼頭兩晚派免費雪糕

另外，局方喺無人機同海上煙火表演呢兩晚都安排咗雪糕車，市民可以由傍晚6點至夜晚8點，喺灣仔碼頭入口旁拎免費雪糕，每人限攞一杯，送完即止。