【Emily】水署遏藻類保水質 30萬條魚苗投水塘食食食

【明報專訊】香港有17個水塘，總容量5.86億立方米。為保持水質，水務署原來會喺有過多藻類生長嘅水塘，投放約30萬條鯿魚、大頭魚同鯪魚魚苗，利用唔同魚類嘅攝食特性清除水藻，維持生態平衡。水務署漁務技工（又叫「水塘漁夫」）就會按時利用刺網捕魚，記錄水塘魚類嘅種類、數量、大小等信息，了解變化趨勢，仲會遙控無人船到唔同監測點抽取水樣，做恆常水質監測。

水務署喺政府新聞網訪問話，全港20間濾水廠採用3層水質監測系統，第1層係在線水質監測系統，利用水質監測儀器24小時自動監測唔同濾水過程嘅水質；第2層係現場主要控制測試，人員喺濾水廠即場檢測濾水過程嘅主要水質參數；第3層係全面水質監測，化驗室人員會定期抽取唔同處理階段嘅水樣本，做詳細嘅物理、化學、細菌、生物同輻射分析。