【Emily】劏房兒童畫展 看看小住客的自白

【明報專訊】繼去年喺西九龍中心首次舉辦劏房兒童畫展，非牟利機構「社築同夢社區發展服務」由上周五至噚日，喺銅鑼灣時代廣場舉辦「兒居不宜居──深水埗劏房兒童畫展」，盼藉此加強社會對劏房兒童權益嘅關注。

喺廁所做功課 形容屋似「狗窩」

活動展出50幅由深水埗劏房兒童創作嘅畫作。初中生簡國駿嘅作品描述佢喺廁所做功課，話唔能夠邀請同學嚟屋企玩，形容屋企就好似「狗窩」。另一名簡小朋友畫咗佢目前嘅住所同理想家居，話現時同哥哥瞓碌架牀，希望可以自己一個瞓。

畫展項目統籌林先生引述社會服務聯會喺2021年嘅研究，話劏房家庭人均面積只有3平方米，認為狹窄嘅物理空間限制劏房兒童嘅心理發展空間，所以佢哋值得受到關注。另外，展覽設有留言板，畀參觀者為劏房兒童打氣。