【Emily】多啦A夢展擺周杰倫古天樂人形牌 網民唔知有乜關係 主辦話致敬香港電影

【明報專訊】《100%多啦A夢&FRIENDS》巡迴展覽7月舉行，主辦方噚日喺facebook話，到時會喺星光大道鋪上多啦A夢主題色調嘅藍地氈，並喺多啦A夢同好友嘅雕塑旁擺一眾電影人嘅漫畫化人形立牌，包括多啦A夢廣東話配音員林保全，同埋周杰倫、古天樂、陳法拉等。不過，唔少網民對呢份名單似乎唔太滿意，有人話除咗林保全，「都唔知其他人有乜關係」，亦有人話應該要有唱主題曲嘅陳慧琳、廖碧兒。

主辦方話展示人形立牌係向香港電影致敬，一共會擺13個電影工作者嘅人形立牌，除咗林保全，仲有台灣歌手周杰倫，香港演員古天樂、劉俊謙、吳彥祖、陳法拉、林峯、林雪、羅蘭、周秀娜，袁澧林，仲有導演杜琪峯同歌手鄭伊健。有網民留言話，多啦A夢一眾香港配音員都值得敬重，又有人話「周杰倫幾時變咗香港（人）」。

另外，主辦方噚日亦話，巡迴展嘅收費展廳門票已售罄，多謝支持。巡迴展7月13日開始，到8月4日結束，而星光大道上嘅人形立牌同巡迴展同步開始，但就會多擺一個星期，到8月11日結束。