【Emily】楊潤雄：傾緊《城寨》劇照道具辦展

【明報專訊】揚威海外嘅電影《九龍城寨之圍城》不但本地票房報捷，內地亦大收旺場。文體旅局長楊潤雄話，《九》喺政府空置場地搭建嘅場景，拍完後已拆咗，場地還咗畀政府。政府同《九》電影公司傾緊將電影物資好似劇照、片段、道具等物料做展覽，吸引市民同旅客參觀，了解九龍寨城掌故同電影製作背後嘅故事，期望經《九》帶動，結合相關旅遊項目，發展電影旅遊產業。

楊潤雄噚日以書面回覆立法會議員提問，話除咗研究將電影物資做展覽，康文署亦將優化導賞團內容同安排，加強有關九龍寨城嘅歷史介紹，同埋同《九》故事背景同場景嘅關聯，康文署亦會聯同旅遊事務署為旅遊從業員提供培訓，增強佢哋對寨城歷史同景點嘅認識，提升本地旅遊景點吸引力。

另外，創意香港亦會聯同電影發展局研究，考慮喺推廣電影文化同埋電影相關知識產權方面，透過電影發展基金支持相關展覽同推廣活動。楊潤雄仲話，政府會繼續透過合適香港電影，開發以電影為主題嘅旅遊項目吸引遊客，並同時推廣香港電影文化。