【Emily】社工抗議註冊局修例 批狄志遠扮代表

【明報專訊】立法會法案委員會今日第一次開會審議社工註冊局改組修例，早前社福界議員狄志遠好遲先就修例方案表態，惹起部分社工不滿。社工謝世傑同另一名社工噚日去咗政府總部外請願，質疑修例係政治干預專業自主，又批評狄志遠之前喺福利事務委員會會議「靜坐」同無為業界提出抗議，質疑佢做咗啲咩去了解兩萬幾名社工嘅意見，叫佢唔好扮代表。

狄：有持續諮詢業界

兩人批評狄志遠無主動就今次修例蒐集業界意見，要求狄志遠同業界對話同做全面意見調查，充分反映業界意見。阿狄就到場同佢哋對話，又邀請佢哋約個時間傾吓。阿狄話自己有持續諮詢業界，而業界有唔同嘅聲音，有人認為要改革社工註冊局，亦有人擔心今次係行政干預專業，自己將會喺立法過程反映意見。

早前勞福局長孫玉菡羅列社工註冊局5宗罪，其後提出修例方案完善管治，包括大增註冊局委任成員人數，阿狄喺方案公布後一星期先公開回應提出3項建議，又話若方案能令社福界走向更專業就支持。