【Emily】港漫北上 國際動漫節首設館

【明報專訊】香港動漫產業衝出香港，喺政府「創意香港」資助下，香港數碼娛樂協會公布會參加稍後喺杭州同東莞嘅大型展覽，並首次設立香港館，推廣香港動漫、遊戲、潮玩及相關產業。協會噚日率先舉行第20屆中國國際動漫節（杭州）香港館誓師大會，有30家參展商同相關產業龍頭企業代表出席。

香港數碼娛樂協會主席彭子傑話內地市場潛力優厚，而本港業界首次喺中國國際動漫節、中國國際影視動漫版權保護和貿易博覽會設香港館，希望展現本地實力，開拓商機。協會喺5月29日至6月2日舉行嘅中國國際動漫節會設480多平米「香港館」，館內會有經典嘅香港漫畫或創作角色嘅角色扮演、巨型雕塑等。

至於7月底舉行嘅中國國際影視動漫版權保護和貿易博覽會，場內「香港館」將有20間香港數碼娛樂企業展示產品，並藉展館推動大灣區合作。