【Emily】大埔墟站裝完幕門 東鐵第5個

【明報專訊】港鐵舊年5月開始為東鐵線13個車站安裝月台幕門，目標兩年內、即係出年全線完成。一年過去，進度係點呢？港鐵噚日公布，最新累計有5個車站已經完成閘門安裝工程，繼馬場、落馬洲、上水及沙田站後，大埔墟站月台幕門噚日全部裝晒並投入服務。

4站裝緊 目標今年搞掂

港鐵話，太和站嘅月台幕門工程亦即時展開，連同大圍、粉嶺及火炭站，目前有4個車站同時做緊工程。不過，除咗火炭站因為有備用月台，可以喺日間做工程之外，其餘3個車站就只可以喺夜晚收車後「黃金兩小時」安裝。港鐵話呢4個車站嘅工程會以今年內完成為目標，而裝緊幕門期間，會繼續派月台助理維持秩序同協助有需要乘客，密切監察月台情况，盡量避免意外發生。