【Emily】議員參觀廚餘設施 田北辰讚「再生俠」

【明報專訊】立法會環境事務委員會噚日參觀大埔墟街市嘅廚餘處理系統「廚餘再生俠」，同埋喺北區沙嶺嘅有機資源回收中心第二期（O·PARK2）。委員會主席、民建聯劉國勳促請政府完善廚餘回收配套，包括向市民大規模派發家居廚餘桶、大幅增加智能廚餘回收桶數目，培養市民回收廚餘嘅習慣。

劉國勳倡廣派廚餘桶 增智能機

委員會噚日先了解「廚餘再生俠」運作，系統目前已安裝喺副食品批發市場、公眾街市等10個處所，會將廚餘轉化為漿液，可減少上門收集廚餘嘅次數。一眾議員之後再去O·PARK2參觀。

劉國勳認為廚餘佔都市固體廢物比例最高，但各大屋苑對政府免費資助回收設施反應未如理想，希望當局推出更多措施方便市民同住宅。佢期望香港長遠發展環保事業，物色同引入創新、更具成本效益嘅廚餘處理技術。

實政圓桌田北辰參觀之後就讚「廚餘再生俠」相當慳位，系統只需要一至兩個鐘就將廚餘變成漿液，而且會除臭，唔會好似廚餘回收箱咁，好快爆滿。田北辰又話，如果全港廚餘收集前都預先變成漿液，相信可以節省唔少處理程序。