【Emily】矯正踩單車姿勢 知專研傳感背帶獲發明獎

【明報專訊】踩單車姿勢唔正確，踩得唔快之餘仲有可能受傷。香港知專設計學院（HKDI）團隊研發咗穿戴式傳感裝置「PostureSense」，望落係一條可拆式、編織物料嘅背帶，當使用者將背帶沿脊骨而下、扣喺運動上衣外，再連接手機應用程式，就可以根據實時數據調整姿勢。相關設計已獲日內瓦國際發明展銅獎同紅點設計概念大獎。

領導研究團隊嘅HKDI知識資源中心知專設創源（CIMT）副總監李泓羲話，識咗一班每日踩單車返工嘅上班族後，先了解到脊骨傾斜度對踩單車效益嘅影響，令佢萌生研發改善運動姿勢裝置嘅念頭。佢話，單車手比賽時都會傾前上身，其間亦要維持適合嘅傾斜度，相信裝置可幫到單車手使用正確嘅肌肉群。

稱洽內地品牌 擬安排運動員試用

至於「PostureSense」嘅原理，李泓羲解釋，背帶加咗導電紗線，內置感應晶片蒐集電阻數據，只要使用者開始運動、上身向前傾並伸展肌肉，背帶就會自動啟動運作，並產生電阻數據；之後系統會利用數據分析，計算出脊骨嘅傾斜度。佢又透露團隊正同內地一個單車運動服裝品牌傾緊合作，計劃安排運動員試用。