【Emily】梁榮武：港睇到極光機會微

【明報專訊】地球自上周五（10日）起遭罕見猛烈太陽風暴襲擊，所造成嘅地磁暴係2003年以來最強，英國、日本、中國新疆同北京等多地市民罕有地觀賞到極光，紛紛網上分享照片。不過香港市民就可能要失望喇，香港氣象學會發言人梁榮武噚日喺港台節目《千禧年代》話，雖然同香港緯度相若嘅古巴都有出現極光，但根據外國預測，只有特定地區出現極光機會較大，而香港睇到嘅機會係非常低。

今明兩年太陽黑子數目高峰

梁榮武並解釋，極光出現嘅原理，係太陽表面磁場以耀斑形式釋放能量，粒子撞到大氣層時就會形成極光。佢話太陽黑子數目變化為11年一個周期，今明兩年都係高峰，近月黑子數目亦多過美國太空總署預測，非常活躍，代表有好多耀斑爆發機會；但同時會造成擾亂，影響衛星運轉、高頻通訊運作等，飛機與地面聯繫亦有可能中斷。