【Emily】歷屆最大 寵物用品展帶「主子」試玩試食

【明報專訊】「優質寵物用品展2024」噚日起一連3日喺灣仔會展舉行，今屆有超過350個展位，比舊年多近四成，有日本、韓國、新加坡寵物品牌更係首次參展，規模係歷屆最大。展覽涵蓋寵物糧食飼料、服飾、玩具、美容護理等，唔少「狗奴」、「貓奴」等都帶埋寵物去參觀，各位「主子」可以即場試食，甚至試玩玩具。今年展覽仲有寵物界國際級選美賽事「寵愛王國2024年CKUHK全犬種冠軍狗展」，喺香港站將有6場賽事，同場更會舉行美容師資格認證考試、愛萌犬寵物造型大賽、寵物健康講座等多項活動。