【Emily】佛誕臨近 嘉道理：放生習俗被扭曲

【明報專訊】下周三（15日）係佛誕，唔少人當日會參與放生儀式，嘉道理農場暨植物園提醒，放生牽涉動物買賣，而商人為咗提供足夠嘅動物供放生，其實好多動物係野外捉番嚟，唔少更係虛弱同生病嘅狀態。

嘉道理農場話，放生象徵畀動物一個重生機會，可惜因為需求問題，放生習俗被扭曲，有人為求牟利捕捉野生動物，再賣畀市民放生，唔少動物喺被捕捉嘅過程中受傷或死亡，運輸過程又會因為缺糧水而生病，存活率十分低。

放生烏龜難存活損生態

烏龜係放生儀式中最受歡迎嘅野生動物之一，嘉道理農場就話，不時見到淡水巴西龜被放生入海嘅報道，但好多時香港唔係呢啲動物嘅原生生境，佢哋喺野外嘅生存率低，更可能破壞本土生態平衡，影響原生動物嘅食物供應。嘉道理農場呼籲大家喺5月23日嘅世界烏龜日，反思所有龜類嘅處境。