【Emily】非遺技藝 吹糖師傅授基層

【明報專訊】香港非物質文化遺產清單現有480個項目，而吹糖技藝有超過600年歷史，都係香港非遺其中一項。康文署聯同香港社區組織協會，早前安排吹糖藝術家杜煥，向一群來自基層嘅家庭示範及教導點整吹糖。杜師傅好落力向參加者解說，因為其實佢都係來自弱勢社群，年幼時全家移居香港，初來時都係住劏房，家中經濟條件唔好，到?家可以幫助他人，杜師傅都話好開心。

杜師傅先把糖料揑成管狀，管嘅一邊畀參加者吹氣，另一邊糖料開始脹大時，杜師傅趁機將糖膠揑成唔同造型，包括動物造型，參加者從中學習吹糖嘅各種技巧。

安排活動嘅社協社區組織幹事阮淑茵話，參加者來自基層，可能佢哋平常生活過得唔愉快，或有不快經歷，希望藉住呢類活動為佢哋帶來歡樂，同時畀大家認識吓非遺技藝。

康文署話，呢個吹糖體驗工作坊係非物質文化遺產辦事處非遺資助計劃其中一個項目，資助計劃主要目的係提升公眾對非遺項目嘅認識同了解，支持傳承工作。截至去年年底，已資助項目共有124個。