【Emily】新思維擬訪美 唔擔心犯23條

【明報專訊】《基本法》23條立法後，美國早前話會對本港多個官員實施簽證限制。新思維噚日同美國駐港澳總領事梅儒瑞見面，話計劃下半年組團訪美，若果成行，相信係《港區國安法》實施後首個公開訪美嘅香港政黨。

新思維主席狄志遠噚日與副主席黃俊瑯、秘書長陳家偉同梅儒瑞會面，就本港政治、經濟議題交流。新思維喺會上提出，計劃下半年組織約10人赴美交流。阿狄話獲梅儒瑞積極回應，對方話可能有國會議員想同新思維見面。阿狄就話唔介意同美國官員、國會議員會面，包括提出制裁香港嘅議員，如果見面會反映希望美方停止制裁。

陳家偉話訪問團細節待定，預計去一周左右，考慮到華盛頓、紐約、洛杉磯等。從事創科嘅黃俊瑯就話計劃去當地科技機構參觀考察。

阿狄認為訪美係正常溝通，唔擔心觸犯23條，屆時討論都唔會設限。佢話目前香港同歐美嘅民間交流「靜咗」，希望增加溝通，此行與其他人推動「民間外交」相輔相成。雖然有份通過23條立法，阿狄就相信自己唔會被拒入境美國，即使自己簽證唔批，其他人都會照去。