【Emily】走塑活動張宇人黃家和分兩房 局長走兩場 搞手尚海龍話人數太多 唔關「不和」事

【明報專訊】「走塑令」實施超過一周，香港高才通人才服務協會噚日邀請環境及生態局長謝展寰同一班新來港高才一齊自備餐具食外賣，響應用環保餐具。活動同時邀請素有分歧嘅自由黨飲食界立法會議員張宇人同香港餐飲聯業協會會長黃家和出席，結果兩人全程未有同場，活動分開喺兩房間舉行，謝展寰要中途轉房食飯。協會會長尚海龍解釋，分房搞食飯活動係因為報名人數太多，同張黃兩人被指不和「唔關事」。

活動噚日喺金鐘中信大廈嘅立法會議員辦事處舉行，謝展寰到場後先與尚海龍、黃家和喺會議室同部分參加者食外賣，食咗15分鐘後，尚海龍就陪同謝展寰轉場，去另一會議室與張宇人及其他參加者繼續食飯。張宇人同黃家和全程未有同場，亦無影大合照。

張宇人同黃家和一直被指不和，其中張宇人前年曾唔點名批評有人「扮飲食業代表」，質疑對方多年來唔敢參選飲食界選委，但就經常自稱業界代表。

無邀大合照 避太多人辦公室周圍走

尚海龍同Emily解釋，由於參加人數較預期多，所以分房食飯，無邀請影大合照係避免太多人喺辦公室周圍走，影響其他人做嘢。佢話張同黃都係飲食界翹楚，希望二人與高才增進交流，亦相信活動可向新來港人才宣傳「走塑」。