【Emily】準備逾十載 港漂碩士圓警察夢

【明報專訊】現時各紀律部隊都搶人才，警方刊物《警聲》新一期就刊載一名「港漂」投考警隊嘅古仔。故事主角係現年35歲嘅王碩，佢十幾年前來港，喺2011年入讀理大，翌年獲得碩士學位後，先喺一間小學擔任教學助理，爭取符合留港7年成為永久居民身分，以通過成為警察嘅門檻。王碩喺2019年取得永久居民資格，做埋矯視手術，一心於2022年首次投考警隊，惜未能過關，之後花一年時間重整及鍛煉，捲土重來，成功獲警隊取錄。

出生於大連嘅王碩話希望將來有機會向刑事偵緝方面發展，佢喺《警聲》訪問中仲話，希望以個人經歷鼓勵包括「港漂」等有心人加入警隊，認為「有心不怕遲」。

海關VTC合作增潤課程

海關近年亦積極喺校園推廣，近日同職業訓練局（VTC）簽署合作備忘錄，喺多個範疇展開並加強合作，協助年輕人投身紀律部隊，雙方會以香港海關學院嘅培訓內容，增潤IVE原有嘅「紀律服務管理高級文憑」課程，又會邀請關員就體能訓練單元分享心得，安排學生到海關學院參觀考察等。