【Emily】稱收一投訴 「一拳」學校推理書展被取消 話福爾摩斯都莫名其妙 移師店內辦「推理週」

【明報專訊】獨立書店「一拳書館」原定以推理為主題，到某間學校舉行小型書展，不過一拳噚日喺facebook話，因為「一個匿名投訴」，書展就被取消，戲言連東野圭吾、Agatha Christie、陳浩基、福爾摩斯都感到莫名其妙，「以推理為主題的書展會有多大逆不道？」不過，一拳自答話明白呢個問題係多此一舉，因為「現今社會對人不對事已成為常態」。一拳無公開學校名稱。

一拳書館提到，為今次書展做咗唔少工夫，包括挑選中英文書單、真金白銀訂書、輸入資料，仲有熱愛推理小說嘅同事一直諗點樣喺書展介紹好作品畀學生，但最終因為一個連名都無嘅投訴，就把書店嘅心機和血汗統統付諸流水，「合理不合理？已經無需要討論，大概現在只能夠學習新世界的日常」。

喺學校搞唔成書展，一拳就將書展移師店內舉行，由聽日至下周一（5月1日至6日）舉行「一拳推理週」，同時會辦幾場分享會等，由推理迷店員推介心水。

近月有唔少獨立書店反映被政府或監管部門密集式「巡查」，一拳書館係其中之一，舊年12月一拳喺facebook話，15日內有唔同部門上門巡查一拳及另一分店二拳10次，部分係例行巡查，亦有係接到投訴，搞到佢哋「真心攰」呢。