【Emily】警察學院開放日 警隊180周年封時間囊 200年再開

【明報專訊】下周一（15日）係全民國家安全教育日，警方聽日舉行「國家安全教育日暨香港警隊180周年警察學院開放日」，提高全民嘅國安意識。警方話市民對開放日反應熱烈，登記索取嘅門票超過兩萬張，最後抽籤選出上下午時段各2500個參加者，而落選嘅就可以喺警隊facebook或YouTube睇大匯演直播。

重點活動之一係為紀念警隊成立180周年而設嘅「時間囊封存典禮」。警隊管理層同埋各職方協會代表會喺時間囊放入別具意義嘅物件，移至警察總部保存，直至200周年、即係20年後開啟。

開放日另設「國安守城」、「跨越180」、「警伴同趣」、「專業新警界」四大主題區，包括展示全新嘅「國安號」列車，以動態方式同市民介紹國家安全，另有特別部門精銳裝備同現役特色警察車輛、攤位遊戲等。

警方亦訂製咗5款警隊模型車送畀市民，包括戰術巴士、爆炸品處理課行動車輛、小型巡邏車、交通部巡邏車及警務處長座駕，詳情稍後喺社交媒體公布。