【Emily】國安教育日連串活動 林定國蔡若蓮訪學校玩AI×中華文化

【明報專訊】4月15日（周一）係全民國家安全教育日，未來幾日政府有唔少相關活動舉行，律政司長林定國及教育局長蔡若蓮噚日去咗五旬節聖潔會永光書院，參加學校舉行嘅認識中國文化活動。

學生利用科技及人工智能（AI）技術結合中華文化，林定國參觀時同學生一齊用AI技術發出指示，將《登鸛雀樓》呢首詩嘅內容，化成一幅有「鹹蛋黃」太陽背景嘅嶺南畫風圖畫。佢話學生又教佢香囊嘅歷史及製作方法，佢跟住指示，將薰衣草加入薄荷，製成一個可以讓人安眠嘅香囊。

政府「添馬台」facebook專頁就話，下星期一係特區完成《基本法》第23條立法後第一個「全民國家安全教育日」，意義重大，政府視之為盛事，各項活動陸續登場，包括升旗儀式、紀律部隊和輔助部隊開放日等，全港18區將有不同類型活動，包括嘉年華會、花車巡遊等。