【Emily】調查：83%港人話唔夠瞓 近九成願犧牲睡眠 換打機煲劇

【明報專訊】生活易今年3月訪問咗704人，了解港人嘅睡眠問題，結果顯示74%受訪者認為自己睡眠質素差，原因依次序係壓力大、睡前使用電子產品、少做運動等（見表），而壓力主要來自工作（78%）、家庭（51%）及經濟（48%）；受訪者可選擇多於一個原因。

四成人感交通工具仲好瞓

調查又顯示，83%受訪者話唔夠瞓。至於睡眠問題，最多人覺得起身後仲係攰，其次係容易扎醒、要半個鐘以上入睡、淺睡多夢等。要瞓得好嘅話，69%人認為環境寧靜最重要，無壓力同多做運動都好重要。

調查發現88%人寧願犧牲睡眠時間做其他嘢，最大原因係想換取時間玩電話、用電腦、打機或煲劇。為咗彌補睡眠時間，76%受訪者曾喺公共交通工具補眠，甚至有四成人覺得交通工具比屋企張牀更好瞓。

精神科專科醫生汪嘉佑提醒，極速入睡或喺睡牀以外嘅環境輕易入睡都唔係好事，甚至可能係有睡眠障礙；而健康嘅睡眠係一個逐漸進入睡眠狀態嘅過程，睡眠充足者嘅入睡時間約10至15分鐘。