【Emily】棄耕農地復育本地米 吸瀕危雀仔重返大嶼

【明報專訊】近年唔少團體復育失傳多年嘅本地稻米品種，其中香港觀鳥會2021年開始喺荒置多年嘅大嶼山水口村展開生境優化計劃，成功喺舊年秋季種出大嶼山40幾年嚟首批「水口米」，仲吸引到極度瀕危、俗稱「禾花雀」嘅黃胸鵐，易危嘅田鵐，同埋近年本地數量呈下降趨勢嘅灰頭鵐、小鵐嚟搵食，成為佢哋過境遷徙嘅中途補給站。

觀鳥會亦發現，水稻田同周圍水道有其他具保育級別嘅野生動物，例如俗稱「田雞」嘅國家二級保護動物虎紋蛙，仲有香港較稀少嘅水雉等。項目經理張家駿話，今次計劃採用咗生態友善農耕方法，放棄用大型挖泥機，而係靠人手用泥鏟翻土重整農地，再用小型犁田機犁田，一步步將棄耕多年嘅農地重新整理成水田，減少開田對原生物種影響。

觀鳥會話，農地棄耕會令濕地面積減少，威脅野生動物棲息地。佢哋計劃未來擴大農田同水田面積，再種植約10個品種嘅稻米，包括昔日水口主要種植嘅黑糯米，同埋其他曾經喺大嶼山種植嘅品種，期望下一茬「水口米」吸引更多物種。