【Emily】議員上「雪龍2」號興奮打卡 陳家珮影埋船員睡房洗手間

【明報專訊】中國第一艘自主建造嘅極地科考破冰船「雪龍2」號噚日起訪港，多名官員、行會成員、立法會議員均把握機會上船打卡。其中行會成員林正財坐上船長座椅與船員合照，新民黨議員陳家珮（Judy）就四處參觀，到船員睡房同洗手間都不忘留影。

政府噚日為「雪龍2」號舉行歡迎儀式，多名議員獲邀參觀。Judy話好榮幸可以登船參觀各項設備，期待市民可以感受到國家嘅科研實力。佢喺船上四處打卡，與特首辦主任葉文娟一齊坐上泊喺甲板嘅直升機合照，又去到甲板、駕駛室等，連船員睡房同洗手間都影晒相。另一議員尚海龍就一邊揸住區旗、一邊攞住印有「雪龍探極」嘅飲用水喺船上自拍。

林正財就影低「雪龍2」號於南極尋獲嘅生物「棘蛇尾」同「柳珊瑚」，又到駕駛室坐上船長座椅，與船員合照。民青局副局長梁宏正與政助張進樂亦去咗，探望參與歡迎儀式嘅青少年制服團體成員及負責船上導賞工作嘅青年，為佢哋打氣。