【Emily】教局提建「國際教育樞紐」無寫「目標」 惹葉劉嬲嬲

【明報專訊】新民黨葉劉淑儀噚日喺立法會教育事務委員會會議上，對教育局提交有關「建設香港成為國際專上教育樞紐」文件唔多滿意，「我覺得你呢張paper要寫過，你係一連串措施，但你嘅政策目標係乜嘢？無寫出嚟」。葉太要求局方再交補充文件，說明成為國際教育樞紐嘅目標、得益者、對社會好處等，甚至可以比較其他地方例如新加坡嘅相關策略。

葉太發言話，局方提交嘅文件無寫出政策目標，反問「咩叫國際教育樞紐？」葉太話，要成為國際教育樞紐應吸引到最優秀嘅學生，「要吸引最優秀嘅學生，唔係搞博覽會，係有最優秀嘅教授」。

葉太引述自身經驗，話外國學生係揀知名嘅教授，所以外國名校好重視有幾多諾貝爾獎、菲爾茲獎得主任教，又話如果院校做唔到「真係國際一流」，就吸引唔到最優秀嘅學生，「只吸引到鍾意嚟香港生活、讀個學位嘅（學生）」。

蔡若蓮：目標好清楚 配合十四五大灣區

教育局長蔡若蓮回應話，目標講得好清楚，主要係配合十四五規劃香港八大中心同一帶一路倡議嘅大灣區發展等。對於要睇唔同地區做法，佢表示認同，又話同其他國家唔係要「你死我亡」，而係要合作產生協同效應。