【Emily】點搵墮海飛機黑盒 運物局演練片解密

【明報專訊】每有飛機失事，「黑盒」係還原事故真相關鍵，不過黑盒到底係咩樣，如果飛機墜海又點樣大海撈針？運輸及物流局噚日喺facebook分享舊年底局方轄下民航意外調查機構（AAIA）同消防處聯合搜索飛機黑盒嘅演練片段。據片中介紹，黑盒唔係黑色，而係一個橙色裝置，裝置上會有一個銀色圓柱狀嘅水底定位信標，一旦飛機跌落水，定位信標接觸到水就會啟動入面嘅電路板，連續30日發出37.kHZ嘅超音波脈衝信號，調查人員可以靠探測呢啲信號搜尋黑盒。

水底定位信標 可發30日信號

正式落水搜索前，調查人員會先放一個水底定向器落水底，然後伏喺船上面，透過耳筒聽吓邊度嘅「啲啲」聲信號最強，再用儀器記錄同計算相關位置經緯度。消防處之後會派水底遙控機械人掃描海底收窄搜索範圍，鎖定水域後潛水員先會出動，配備嘅氣樽夠佢喺10米水深環境工作45分鐘。搵番黑盒後，潛水員會先發出水面標誌浮標，確保拍攝完現場環境同保存證物後，先會將黑盒打撈上水面，放入特定保存箱，再交畀AAIA實驗室作特別處理同讀取數據。

局方預告，下一集會再講點樣分析黑盒內嘅錄音同飛行數據，重塑失事時刻，有興趣者可以留意。