【Emily】特首去文物展 不忘宣傳弘揚辦

【明報專訊】政府「弘揚中華文化辦公室」有份協辦嘅首個中國通史系列展覽「河南夏商周三代文明展」，聽日起至7月8日喺香港歷史博物館舉行。特首李家超噚日到場預覽，幫展覽宣傳推介。佢話「弘揚辦」今個月成立，將透過籌劃推動中華文化同歷史嘅活動，以宣揚中華文化及推廣愛國主義教育，並呼籲大家多參與弘揚辦活動，更好認識及欣賞中華文化嘅深厚內涵。

李家超噚日喺社交平台發帖，認為要培養市民愛國情懷，先要增加大家對國家文化嘅認識，而學習國家歷史就係最好嘅起步點。佢亦感謝河南博物院及省內十幾間文博機構借出超過150件珍貴文物，又話展覽除咗展出包括夏、商、周三代嘅青銅器、玉器、陶器等文物，亦結合AR（擴增實境）等現代科技元素，增加觀賞趣味，令歷史活現眼前。