【Emily】泳灘水質報告 南區最靚 荃灣一般

【明報專訊】天氣開始熱，大家準備好感受陽光與海灘未？環保署噚日公布《2023年香港泳灘水質年報》，話全港42個憲報公布泳灘持續符合泳灘細菌水質指標，26個被評「良好」，較前年少一個，16個被評「一般」，比前年多一個。南區有10個泳灘獲評「良好」，係全港最多，區內嘅舂坎角、南灣及聖士提反灣3個泳灘，更喺全個泳季維持「良好」等級。

環署：水質波動因極端天氣

至於荃灣區8個泳灘，所有泳灘被評「一般」。屯門區6個泳灘，獲評「良好」同「一般」各佔一半。環保署話，舊年整體泳灘水質有輕微波動，主因係受極端天氣影響，其中去年9月份總雨量達1067毫米，創歷史新高，包括超強颱風「蘇拉」襲港、颱風「海葵」嘅殘餘低壓槽所帶嚟持續暴雨。

署方又話，上年泳季累積降雨量2751毫米，較前年1786毫米多54%，亦比1991年至2020年呢30年平均值高20%，認為連場暴雨可將陸地污染物冲刷入海，令海水嘅大腸桿菌有短暫波動嘅上升，但強調係正常波動。大家游水前想知道泳灘水質，可瀏覽環保署網頁。