【Emily】特色渠蓋遍10景點 款式夠地道

【明報專訊】渠務署除咗負責防洪及排污工作，近年都幫手搞搞社區美化，推廣地區旅遊，喺唔同旅遊區設計具特區特色圖案嘅坑渠蓋。渠務署工程師（顧問工程管理部）丘毓婧話，署方揀咗多個富有香港特色且人流較多嘅旅遊景點，由2022年至今已經喺大澳、鯉魚門、林村許願廣場等10個地點安裝超過180個共20幾款特色渠蓋，希望喺美化社區、提升渠務系統形象同時，為市民同遊客增添打卡好去處。

發展局長甯漢豪噚日發表網誌，介紹渠務署嘅特色渠蓋。丘毓婧以鯉魚門為例，指村內有122個特色渠蓋，話署方先了解鯉魚門區嘅歷史及特色景點，最後揀咗山、水、鯉魚、漁船、懷舊小輪、牌坊及燈塔元素。渠務署工程師（新界北）陳裕坤就話，署方去年底就喺林村許願廣場附近設咗8個特色渠蓋，主題當然圍繞許願樹，包括有一棵壯麗嘅大榕樹，樹上掛滿象徵祝福嘅寶牒。