【Emily】創意書院校長有着落 劇作家甄拔濤下周上任

【明報專訊】直資學校香港兆基創意書院舊年8月臨近開學仍登報請緊校長，校方噚日話終於物色到新校長，就係著名劇作家甄拔濤（圖），4月1日上任，有書院代表同Emily分享喜訊時話，唔係愚人節笑話嚟㗎！

攞過柏林戲劇獎 華人首人

書院噚日話，經過一連串招聘、遴選同教育局嘅確認程序，校董會確定由甄拔濤做新校長。校方介紹甄拔濤曾獲德國柏林戲劇節劇本市集獎，係首個華人獲得殊榮。佢亦擔任「再構造劇場」藝術總監、德國曼海姆國家劇院駐院作家（2021至2022劇季）。當年佢將作品《後人類狀况》由德國帶返香港，透過劇場探討人類喺科技急速發展面對嘅困局。

書院話甄拔濤對書院教育同人類（書院對學生嘅稱呼）都唔陌生，因為佢多次駐校教寫劇本同表演藝術，亦有唔少發展想法，期望佢帶書院走向國際。

創意書院舊年2至8月由蔡芷筠署任校長，9月新學年起改由許漢榮署任校長。書院噚日話許漢榮將會以顧問形式繼續合作，感謝佢一直守護書院。