【Emily】博洛尼亞童書展 港設館sell本地文化

【明報專訊】為推動香港兒童圖書同親子讀物走向世界，香港出版總會同香港印刷業商會再獲政府「創意香港」贊助，會喺下月8至11日嘅意大利「博洛尼亞兒童書展」，以及6月19至23日「北京國際圖書博覽館」分別設「香港館」，前者以「我們的香港故事」為主題，展出超過900件展品，包括香港美食、交通同非物質文化遺產等。香港出版總會副會長陳儉雯話希望藉此促進香港同各地交流，「說好香港故事」。

23條本地立法生效無耐，Emily噚日喺佢哋嘅傳媒午宴都問咗出版同印刷界一啲睇法。陳儉雯話暫未見有掣肘，業界大概都知法例嘅範圍，唔擔心寒蟬效應，未必「突然之間箍住咗」，相信創意空間仍在，會照常出版。

出版界：未見23條掣肘

印刷界：唔接涉政治外國訂單

香港印刷業商會副會長任德聰都話立法對業界影響唔大，因為香港廠家大多接外國訂單，較少涉及政治類題材，加上作品本身經過出版社審核。佢仲話為「避嫌」，唔會接外國出版含政治色彩嘅訂單，「見到本書講緊西藏，我哋都唔印㗎」。