【Emily】盧寵茂嫁女 政要紛到賀

【明報專訊】上周六（23日）除咗係23條立法嘅《維護國家安全條例》刊憲生效日，仲係醫衛局長盧寵茂嫁女大囍日子。Emily聽聞，婚禮當日下晝喺深水灣鄉村俱樂部舉行，唔少政府官員、立法會議員等政要都有出席，包括副醫衛局長李夏茵與丈夫、行會召集人葉劉淑儀、立法會主席梁君彥、港大校委會主席王沛詩，場面熱鬧。

盧寵茂噚日經新聞秘書回覆，話女兒上周六出閣，局長邀請咗政府同事、港大醫學院同港大深圳醫院前同事，以及多名行會成員、議員出席婚禮，分享喜悅，婚禮儀式簡約莊重，氣氛溫馨愉快。Emily祝願一對新人百年好合永結同心。

盧寵茂有一子一女，長子係整形外科專科醫生，孻女係律師。佢曾經喺電台節目分享，留學嘅女兒試過假期回港時，凌晨3點幾因時差瞓唔着，佢就揸車同個女出去灣仔食魚蛋粉。