【Emily】世界合一論壇開幕 政府預告推可持續披露準則

【明報專訊】財經事務及庫務局噚日公布建立可持續披露系統嘅願景宣言，政府話會交畀香港會計師公會制訂香港可持續匯報準則（下稱香港準則），以銜接國際，目標今年內完成並推出，上市公司同埋受規管金融機構等適用。財庫局長許正宇話，希望透過相關行動，令香港喺綠色及可持續金融領域緊貼國際趨勢。

金融盛事周頭炮活動「世界合一論壇」噚日舉行，主題圍繞以投資創新實現可持續未來。特首李家超致辭時預告話，政府將發表一份符合國際標準嘅聲明，勾劃香港對可持續披露準則嘅願景。

政府公布嘅願景宣言，指國際可持續準則理事會（ISSB）舊年6月發布首套國際財務報告可持續披露準則，作為全球通用嘅參考基準，再由各地實體自行擬備可比較、一致同可靠嘅氣候以及可持續發展相關資訊。宣言提出目標，盼香港成為將本地可持續匯報準則銜接ISSB標準嘅首批司法管轄區，並分階段實施，喺上市公司同受規管金融服務機構等先應用。