【Emily】社交媒體勿亂tag人？ 私隱署懶人包教護資料

【明報專訊】大眾使用社交媒體已成為日常習慣，私隱專員公署噚日推出兩份懶人包，提醒大家使用智能電話同社交平台時可以點樣保護個人私隱，其中《保護個人資料—精明使用社交媒體》嘅懶人包入面，就話喺社交媒體發布資訊時，唔好隨意喺相片標註（tag）其他人，又叫市民注意社交平台上嘅資訊可以喺大家唔知情下被廣泛分享。

除咗上述關於社交媒體嘅懶人包之外，另外一份叫《保護個人資料—明智使用智能電話》，內容關於加強電話保安，保障電話內儲存嘅資料，同減少使用應用程式嘅風險，例如建議市民切勿移除智能電話嘅保安設定，包括走去「越獄（Jailbreak）」或「刷機（Root）」，要安裝防毒軟件、保持系統更新，亦要提防公共Wi-Fi等。