【Emily】搞夜飛龍巡遊 東區區會設小組谷友好報章宣傳

【明報專訊】新一屆區議會全部成立咗提振地區經濟專責工作小組，負責協助籌辦「日夜都繽紛」等地區活動，今日（26日）東區嘅工作小組會開第二次會議，討論籌辦該區嘅夜繽紛活動「東區夜飛龍巡遊」。睇番會議文件，除咗匯報計劃內容同財政安排，仲有討論宣傳計劃。Emily留意到工作小組成立咗3個宣傳組，其中一個叫「報章宣傳組」，「負責協助在友好報章撰寫文章作宣傳」，另外兩個分別係負責社交平台宣傳嘅「網上宣傳組」，同統籌商戶提供優惠嘅「邀請商戶支持組」。

工作小組主席林心廉話，小組設立目的係想透過唔同報章宣傳，令更多市民參與活動，「報章宣傳組」嘅組長係同為工作小組成員嘅同區區議員植潔鈴。3個小組中暫時只有「邀請商戶支持組」已開始運作，今日開會時會再討論相關細節，睇吓點樣向報章傳媒提供資訊，畀大家寫吓稿。

夜飛龍巡遊5月11號舉行，活動配合每年都搞嘅「譚公誕」祈福儀式一齊搞，活動有夜光舞龍、舞獅巡遊，亦會喺東區文化廣場設打卡佈置，仲有傳統手工藝攤位、舞台表演等。