【Emily】江玉歡讚ComplexCon彈亞博無嘢食 燒埋紅館大球場

【明報專訊】潮流文化界活動ComplexCon一連3日舉行，唔少議員都趁熱鬧潮起嚟。選委界議員簡慧敏以一身「三間」品牌運動服、戴住草帽造型，游走展場同展品自拍，表現雀躍。另一議員江玉歡亦去捧場，話原本以為喺亞博舉行唔會人山人海，殊不知要排隊先入到場，見到唔少遊客，當中不乏潮人，大讚場內年輕人打造嘅氣氛相當好，自己都受到感染，但話香港搞大型活動，有唔少地方要改善。

江玉歡話，周末去到亞博，發覺場館無位泊車，最近要走到航天城，又話亞博內餐飲以快餐速食為主，對遊客唔方便。江玉歡仲講到其他表演場地，話前日經過紅館，見到唔少遊客遠道睇台灣樂團蘇打綠演唱會，但又喺紅館前空地乾等入場，而紅館附近嘅餐廳選擇不多，最近都要走到尖東，灣仔會展同銅鑼灣香港大球場都係同樣情况。江玉歡認為，本地人固然知道邊度有餐廳醫肚，但對遊客來講，就真係唔方便。

話海濱除咗打卡無嘢做

江玉歡講吓講吓，仲扯到去維港兩岸海濱，話海濱餐飲食零售店少之又少，遊客除咗影相同排隊等旅遊巴之外無嘢好做，認為政府喺規劃時要多從經濟角度同用家體驗更細緻咁考慮同設計。