【Emily】高資產淨值港人 年均使87萬去旅行

【明報專訊】早前一項調查訪問咗過千個香港居民，發現高資產淨值嘅港人預算年均用超過87萬元去旅行，而長途同短途嘅平均預算開支分別係15萬元同7萬元。受訪者仲預期今年平均外遊8次以上，比起疫情前2019年嘅7次同舊年6.7次嘅實際旅遊次數，分別增加20%及24%。

調查由渣打銀行委託顧問公司Sandpiper進行，訪問咗1080個香港居民，當中56%係男性，44%係女性，年齡介乎14至78歲。結果顯示，高資產淨值、即擁有780萬元或以上可投資資產嘅港人，較着重旅遊質素，旅遊開支平均比其他受訪者高超過兩倍，主要用嚟提升旅遊體驗，例如住高級酒店或到米芝蓮星級餐廳食飯。

至於旅遊地點方面，日本東京就最受唔同年齡層歡迎，其次係新加坡、曼谷、台灣。34%受訪者偏好一家大細嘅家庭旅遊，31%就鍾意獨自旅遊，其餘係情侶同夫妻旅遊（24%）、與朋友旅遊（8%），同埋帶父母旅遊（3%）。