【Emily】中大圖書館長：讀《紅樓夢》反思判斷真假

【明報專訊】中文大學圖書館館長文奈爾（Benjamin Meunier）噚日喺校方刊物《走進中大》分享閱讀心得，話有一次同事借咗本《紅樓夢》畀佢睇，之後佢無論搭巴士、喺屋企或者去Café都拎住嚟睇，話有鑽進中國逝去年代嘅感覺。

文奈爾話，《紅樓夢》嘅情節將現實同虛幻集於一身，覺得呢本18世紀面世嘅小說，提出今日仍然相關嘅問題，令佢反思點樣判斷咩係真實、咩係「假新聞」等。

佢又話，內地近年出現「躺平」現象，覺得書中主角賈寶玉嘅渙散態度同時下年輕人「互相輝映」。佢話睇完本書，見到寶玉頻密嘅情緒爆發，令佢嘖嘖稱奇。佢覺得賈寶玉厭惡世俗名利，堅拒遵守清朝貴族生活嘅規範同期望，可以視為係佢對自身處境嘅無聲抵抗。文奈爾認為一本好書能夠引導讀者走入另一個時空，引發對生命嘅讚嘆。