【Emily】行人徑晚上發光 將軍澳人「腳踏星河」

【明報專訊】為振興地區經濟，西貢民政處計劃喺西貢市中心同將軍澳設置「 打卡位 」，展示西貢區嘅多元面貌。其中將軍澳南灣畔徑係街坊夜晚散步嘅好去處，嚟緊民政處工程組會喺行人徑上面鋪「夜光螢石」同沙粒，呢啲物料喺日頭吸收足夠紫外線後，夜晚就會發光，營造腳踏星河嘅效果。

工程組噚日鋪咗3米路徑做測試，Emily去睇過，「星河行人徑」發出藍光，有路過嘅市民仲讚嘆好浪漫。工程人員話如果日頭陽光足夠，發光石可以發光6至7小時。行人徑隔籬裝咗兩支紫外線燈，每隔10分鐘會着一次，照射幾分鐘畀夜光螢石同沙粒吸收紫外線。

日間要吸光 或裝紫光燈輔助

將軍澳南灣畔徑係往返清水灣半島之間嘅通道。西貢區議員方國珊話，星河行人徑要有濃密樹蔭遮擋先營造到漆黑嘅環境畀夜光螢石同沙粒發光，好似disco嘅地板咁。

佢話呢個計劃出台後一直受到唔少居民關注，?家行人徑喺測試階段，會睇下發光效果好唔好，若果日間吸收唔到足夠紫外光，據佢所知將會喺有需要嘅位置增設紫外線燈。