【Emily】今年申請到特色旅遊計劃資助 放燈划舟巡遊 洪聖誕活動「日夜都繽紛」

【明報專訊】鴨脷洲洪聖傳統文化節祭祀儀式噚日舉行，活動由朝早10點開始，主辦方先將經過祈福嘅七彩水燈放落水，再由居民同大學生划龍舟拜廟祈福，象徵向洪聖爺祈求平安。現場並有賀誕巡遊，16支巡遊隊伍由海旁洪聖古廟出發，途經鴨脷洲大街及海旁舞龍、醒獅，以及扮演傳統漁民等。未來幾日會有南區繽紛市集同賀誕神功戲。

祭祀儀式至今已有逾百年歷史，今年申請到旅發局本地特色旅遊活動先導計劃資助，亦成為南區「日夜都繽紛」活動之一。文化體育及旅遊局長楊潤雄致辭時話，鴨脷洲街坊同慶公社喺推廣洪聖傳統文化上不遺餘力，亦持續舉辦洪聖賀誕活動，令呢項傳統節慶及重要嘅文化傳統得以保存同延續，亦發揮着團結和凝聚社區嘅作用。

南區區議員張展聰話，活動吸引咗唔少街坊朋友同埋海外人士，而小冊子亦有中英文版本，可以將呢個傳統文化節慶宣揚到外國。

行政會議召集人葉劉淑儀亦應邀出席，大讚跳傳統漁民舞蹈嘅南區幼稚園小女孩表演精彩，大紅舞蹈服裝造型可愛。