【Emily】西九與逾20頂尖文藝機構合作

【明報專訊】西九文化區管理局噚日宣布，會喺本月24至26號舉辦嘅首屆「香港國際文化高峰論壇」期間，同全球超過20間頂尖文化藝術機構簽署合作意向書，推動全球文化藝術界社群嘅長遠協作。根據公布，呢批藝文機構來自11個國家，包括法國凡爾賽宮和特里亞農國家博物館、日本東京國立博物館、英國維多利亞與艾爾伯特博物館，仲有上海博物館等，合作範圍涵蓋共同製作及安排巡迴展覽、藏品分享、藝術品同文物修復等。

西九文化區管理局董事局主席唐英年話，簽署合作意向書標誌住西九文化區發展嘅另一個重要里程碑，預期會將全球藝文協作提升至新層次，為香港開啟文化創意連繫世界嘅新篇章。

本周六免費坐電車

今次高峰論壇係「藝術三月」一項重點活動，講開呢個品牌，文體局亦會串連推廣由政府舉辦、資助或支持嘅文化藝術盛事，例如呢個周六舉辦電車免費乘車日，到時市民可免費乘搭所有電車路線，暢遊港島及享受藝術與文化嘅盛宴。政府另一目標係發揮文化藝術盛事嘅最大經濟效益，鼓勵旅遊、酒店等行業同文化藝術界合作，共同打造「藝術三月」品牌。