【Emily】港鐵「RADO鐘」陸續退役 研保留部分展覽

【明報專訊】早前facebook專頁「香港老美 老香港的美學印記」發帖，指港鐵站內嘅瑞士RADO雷達鐘，因為合約完結同埋無零件替換，將陸續被拆除。版主仲去勻金鐘、天后、炮台山、北角、鰂魚涌、油塘同觀塘站觀察，發現真係無晒雷達鐘。

Emily前日喺太子站月台就仲見到雷達鐘。港鐵回覆Emily話，早期喺車站安裝嘅時鐘將陸續退役，公司會探討個別時鐘可否保留作展覽，但無透露仲有幾多個鐘未拆。港鐵並話，已經喺車站大堂同月台安裝乘客資訊顯示屏，可顯示時間、天氣等資料。

「香港老美」專頁仲翻查咗1979年嘅《華僑日報》，提到瑞士雷達表喺1978年11月將全世界最準確嘅「銫頻率計時器」送畀當時嘅地下鐵路，安裝喺地鐵行政大廈作為「母鐘」，加埋地鐵沿線700個「隨行子鐘」，整套系統價值350萬元，為市民提供每日快慢唔超過百萬分之一秒嘅報時服務。